Nasurok P300,000 a gatad ti nadumaduma a processed meat ti nasalamaan idiay Barangay Bio, Tagudin, Ilocos Sur.
Dagiti kontrabando ket nailugan iti refrigerated van truck a minaneho ti agtawen iti uppat a pulo ket tallo, taga-Libis, Quezon City.
Kadua ti drayber dagiti dua a helper-na nga agtawen iti duapulo ket pito, taga-Barangay Lawa, Calamba, Laguna ken ti agtawen iti duapulo ket walo, taga-Quezon City.
Nasitar ti Tagudin Animal Quarantine Checkpoint ti lugan a nangikarga iti 9,092 a kilos ti nadumaduma a processed meat nga aggatad iti P394,922.
Nalabsing ti drayber ken dagiti dua a helper ti Section 4 iti provincial ordinance gapu ta saanda a nagpaidalan iti inspeksion.
Dagiti naglabsing agraman ti lugan ken ti kargana ket nakakustodian iti Tagudin Animal Quarantine Office para iti proper disposition.
