VIGAN CITY –Nasurok P11-milyon a pisos ti lugi dagiti manggalap idiay Nagtupacan, San Vicente, Ilocos Sur gapu iti napasamak a fishkill idi napan a lawas.
Segun kenni Nestor Domenden , regional director ti Bureau of Fisheries and Aquatic Resources (BFAR)- Region 1, sangapulo a porsyento laeng kuma iti karayan ti maikkan ti fish cage ngem idiay San Vicente ket siyam a pulo ket lima a porsyento dagiti napakatan isu a nasobraan ti bilang dagiti ikan iti kadanuman.
Kalaksidanna ket natay dagiti ikan gapu ti sobra a panagpakaan wenno overfeeding agsipud ta dagiti dadduma a manggalap ket maminpito da a pakpakanen dagiti ikan tapno nadardaras da a dumakkel.
Inaig iti dayta ket inbalakad ni Domenden a maidalan iti panagsanay dagiti manggalap iti usto a panagpadakkel ti ikan tapno saanen a maulit iti pannakalugi da.
Inpasigurado na a nakasagana a tumulong ti BFAR kadagiti apektado a manggalap.
Maipalagip a nasurok sangagasut a fish cage iti naapektaran ti fishkill a ti kada maysa a fish cage ket sangapulo a ribo iti karga na nga ikan.
