VIGAN CITY – Nasurok nga innem a ribon a tattao iti naisakup ti force evacuation gapu ti panagbettak ti Taal Volcano idiay Batangas idi kalman.
Ti pannaki-uman ti Bombo Radyo Vigan ken ni Lexie Masiglat, regional information officer ti Region IV- A (CALABARZON), naipan dagiti nagbakwit idiay mainland Batangas tapnu nataltalged da ken addan dagiti relief items a naited kadakuada.
Dagiti nagbakwit ket agnanaed iti mismo Taal island ket isuda iti kangrunaan nga apektado iti pasamak isu a naisakup da ti forced evacuation.
Agsipud iti dayta, sinuspenson iti gobernador iti klase iti nasao a probinsiya ken uray ti Malacañang ket nangiyetnag dan iti bilin nga awan iti klase ken serrek ti opisina idiay National Capital Region, CALABARZON ken Region 3 gapu ti ash fall nga epekto ti panagbettak ti bulkan.
Ti Taal Volcano ti maysa kadagiti kabassitan a bulan iti intero a lubong ken maikadua a kaaktibuan a bulkan ditoy pagilian a ti naudi a panagbettak na ket idi October 3, 1977.
