VIGAN CITY — Sunurok kumurang 500 a gramo a mapapati a shabu nga aggatad iti P3M ti naglaon iti karton a naputiputan iti packaging tape iti nakita ken naala ti maysa a mangngalap iti kabaybayan ti ili ti Magsingal, Ilocos Sur.
Segun ken ni PSSupt. Jovencio Badua Jr., provincial director ti PNP- Ilocos Sur, timmapug a mapan agkalap idi rabii ti mangngalap a ni Rustan Asuncion, a taga barangay Puro, Magsingal ngem idi agawid ti kabigatanna, nakita na ti nasao a karton a tumtumpaw iti danum.
Innala ken linukatan na ti karton ket inpagarup na a tawas ti nagyanna.
Nupay kasta nagdudua isu nga inyawid na ket inted na iti kapitan da a ni Barangay Capt. Zaido tabalanza nga isu iti nangipaima kadagiti kameng ti PNP- Magsingal.
Ti mapapati a shabu ket naipanen idiay PNP- Regional Crime Laboratory , San Fernando , La Union.
