Nasurok sangaribo a pulis ti naikkaten iti Philippine National Police ita a tawen kas paset iti napabileg nga internal cleansing ti kapulisan.
Maibasar iti record ti PNP, umabot iti 1,043 a personnel ti naikkat sipud Enero 1 agingga Disyembre 3.
Karaman ditoy ti 980 a police non-commissioned officers, 39 a police commissioned officers, ken 24 a non-uniformed personnel.
Segun ken ni PNP Spokesperson PBGen. Randulf Tuaño, umabot agingga iti ranggo ti police colonel ti kangatwan nga opisial ti naikkat iti serbisio.
Kaaduan kadagiti naikkat ket dagiti patrolman nga umabot iti 335, sinaruno ti 292 a police staff sergeants, ken 259 a police corporal.
Kangrunaan a rason ti pannakaikkatda ket ti absent without official leave nga adda 590 a kaso, sinaruno ti iligal a droga nga 82, robbery ken extortion a 39 ken dadduma pay a grave offenses.
