1,559 a kameng ti Philippine National Police (PNP) manipod iti agduduma a national support units ti maideploy para ti maika-44 nga ASEAN Chiefs of National Police (ASEANAPOL) Conference a mapasamak manipod July 22 agingga 26 iti siudad iti Pasay.
Suportaran ti nasao a deployment iti 282 mobility assets ken 3,765 nga alikamen iti komunikasion ken Information and Communications Technology tapno masigurado ti seguridad iti nasao a conference.
Naammoan nga ita a tawen ket ti Pilipinas ti host country ken ti nasao a conference ket addaan ti tema a “United in Vision: Securing People and Strengthening Collaboration” a pakipasetan iti 186 a kumpirmado a delegates manipod kadagiti pagilian a kameng ti ASEAN, ASEANAPOL Secretariat, dagiti dialogue partner ken dagiti observer organization.
Segun ken ni PNP Chief General Jose Melencio Nartatez Jr., ti goal ti PNP ket mai-host a natalged ken naurnos ti nasao a conference a mangpapigsa ti talek ken kooperasion ti ASEAN Police Organizations.
Kinunana a kayatna nga ipakita a ti Pilipinas ket mapangnamnamaan ken katinnulong iti panangipatungpal ti linteg iti rehiyon.
Kabayatanna, ti kangrunaan a patangan iti nasao a gathering ket panangpapigsa iti panagtitinnulong iti rehiyon kontra terorismo, cybercrime, human trafficking, transnational organized crime ken dadduma pay a karit iti seguridad.
