Nasurok P100-K a gatad ti mapapati a shabu ti naala dagiti pannakabagi ti linteg iti buy-bust operation a nakakemmegan ti maysa a mannalon idiay Barangay Lira, San Juan, Ilocos Sur.
Ti suspek ket lalaki nga agtawen iti uppat a pulo, agnaed iti Barangay Baliw, San Juan, maibilang nga Street Level Individual.
Naala manipud iti suspek ti mapapati a shabu nga aggatad iti P107,943.20, a naikabil iti lima a piraso ti heat-sealed transparent plastic sachet a nagserbi kas buy-bust item ken possession.
Naala pay dagiti dua a P500 buy-bust money, cellphone, lighter, wallet, tulbek, ken dadduma pay nga alikamen, argaman ti maysa a motorsiklo.
Iggemen dagiti pannakabagi ti linteg ti suspek ket sangwenna ti kaso a panaglabsing iti Republic Act 9165 wenno Comprehensive Dangerous Drugs Act of 2002.
