Impanawagan manen ti Department of Health ti nasapa a panagpakonsulta tapno maagasan ti panagraira ti sakit a tuberculosis kagiddan ti panangpaliiw ita nga aldaw iti World TB Day.
Maibasar iti Integrated Tuberculosis Information System ti Epidemiology Bureau idi Pebrero 16, 2026, nairekord ti Metro Manila ti 101,807 a kaso ti TB.
Impaganetget ti DOH a numan pay agtaltalinaed a maysa kadagiti kangrunaan a sakit ti TB ditoy pagilian, mabalin daytoy a maagasan no nasapa a natakuatan.
Inallukoy ti ahensia dagiti indibidual a makarikna kadagiti sintomas kas ti uyek nga agpaot iti 2 wenno nasursurok pay a lawas, panagsakit ti barukong, gurigor, panagkakapsut, panagling-et iti rabii ken saan a mailawlawag a panagkuttong a dagus nga agpakonsulta iti kaasitgan a health center.
Libre dagiti serbisio iti public health facilities agraman ti diagnostic testing ken kompleto a panagagas.
