Inrugin ti National Police Commission (NAPOLCOM) nga imbestigaran ti kaso dagiti mapukpukaw a sabungero iti baet nga adda dagiti kameng ti kapulisan a karaman.
Ti addang ket kalpasan ti panangibutaktak ni alyas Totoy, maysa kadagiti akusado a nagbalinen nga state witness a duapulo a pulis ti nairaman iti panagdukot kadagiti sabungero.
Makikammayet ti komisyon kadagiti dadduma nga ahensia para iti imbestigasyon.
Inlawlawag ni NAPOLCOM Vice Chairperson and Executive Officer Atty. Rafael Calinisan a bayat a dagiti dadduma a law enforcement agency ket nakapokus iti kriminal nga aspeto ti kaso, kitkitaen met ti NAPOLCOM ti panangipilada iti kaso nga administratibo kadagiti pulis a mapapati a karaman.
No mapaneknekan a karaman dagiti pulis, mabalinda a maikkat iti serbisyo.
