Basbassit a bagyo iti manamnama a tumama iti pagilian iti panawen ti “very strong” El Niño ngem segun ti Philippine Atmospheric, Geophysical and Astronomical Service Administration (PAGASA), posible a nakarkaru a makadidigra dagiti bagyo a mabukel.
Segun ken ni Ana Liza Solmoro-Solis a hepe iti Climate Monitoring and Prediction Section (CLIMPS) iti Climatory and Agrometeorology Divison (CAD) iti PAGASA, no man pay bimmaba ti bilang ti bagyo tunggal mapasamak ti nakaru nga El Niño, ngumatngato met ti posibilidad a napigpigsa ken napegpeggad daytoy.
Iti agdama ket awan pay iti maipatpatungpal nga El Niño iti pagilian, ngem namnamaen ti PAGASA a mabalin a marikna ti very strong El Niño iti maudi a quarter iti 2026.
Ti El Niño ket maysa a natural a phenomenon nga agreresulta iti panagbara ti temperatura iti Pacific Ocean, nga adda dakkel nga epekto iti klima iti Pilipinas.
Masansan nga agresulta dayta iti napapaut a kalgaw, basbassit a panagtudo ken panagbaliw ti pattern iti panagbukel ti bagyo.
Gapu dayta ket pinalagipan ti PAGASA iti publiko ken lokal a gobierno nga agsagana iti posible nga epekto iti napigpigsa a bagyo kangrunaan kadagiti lugar a masansan a maapektaran ti didigra.
