Maammoanen dagiti Pilipino no sadino iti napanan ti confidential funds ni Vice President Sara Duterte ta sumalangen iti witness stand iti impeachment court ti dua a dati nga special disbursing officer-da inton sumaruno a lawas.
Dayta iti pinasingkedan ni Atty. Benjamin Tolosa Jr., legal spokesman iti prosecution ta mangrugin inton August 17, 2026 ket maisalangen da Gina Acosta ken Edward Fajarda iti witness stand.
Ni Acosta ket SDO iti Office of the Vice President (OVP) a nakagastos iti P500 million confidential funds pakairamanan ti P125 million idi 2022 a maibagabga a naibus iti uneg laeng iti sangapulo ket maysa nga aldaw.
Umabot met iti P112.5 million ti confidential funds iti Department of Education (DepEd) nga SDO ni Fajarda isu a masaludsod kenkuana iti prosecution no napanan ti pondo a naitalek kenkuana.
Segun met ken ni prosecution ken Kabataan partylist Rep. Renee Co, mabukelen ti lasawan a timpuar kadagiti napalabas a trial maipanggep kadagiti sabsabali a nagan a naikkan wenno nakaawat ti confidential funds, aldaw no kaano a naited ti pondo ken uray ti dadduma a banag a naggastosan babaen ti spy fund.
Mangnamnama ni Co a gundawayan da Acosta ken Fajarda ti gundaway tapno ipalawag kadagiti umili no sadino ken kasanoda nga inaramat ti pondo nangruna no patienda nga awan ti anomalia iti pannakaaramatna.
