VIGAN CITY – Nakurang limapulo ket tallo a ribon nga acres ti nauram gapu ti agtultuloy a wildfire idiay California a nakadadaelan dagiti balbalay, istruktura ken nakatkatayan ti dadduma a tattao kas pinasingkedan ni Bombo International Correspondent Isidro Madamba Jr.
Iti pannaki-uman ti Bombo Radyo Vigan ken ni Madamba Jr., tinawen a parikut ti wildfire iti pagilianda gapu ti nakaro a tikag ken nangato nga atmosphere temperature idinto a no dadduma ket naangin, adda dagiti kimat ken bagyo.
Daytoyen a wildfire ti kakaruan ita a tawen agsipud ta idiay Mariposa County ket immabot iti duapulo ket maysa nga acres ti naapektaran idinto nga iti wildfire idiay McKinney ket umabot met iti tallopulo a ribo nga acres ti naapektaran.
Gapu dayta, inyetnag ni Gov. Gavin Newsom ti state of emergency isu a kapilitan a maibakwit dagiti residente nga adda iti asideg ti wildfire ken maipaay ti amin a tulong kadagiti apektado a tattao kas ti taraon, kawes, ken evacuation center.
Rinibo a bumbero dagiti mangdepdepdep iti apuy isu a naibilangen a 60 percent ti nadepdep idiay Mariposa County ngem idiay McKinney ket saan pay laeng a nadepdep a pulos.
