VIGAN CITY-‘Saan a ti sindikato a grupo ti taktakkaban ni outgoing Customs chief Isidro Lapeña no di ket iti kinakapoy dagiti tao na isu a nakalibas ti binilyon a pisos a shabu shipment’ ,dayta ti inpaganetget ni Antipolo Rep. Romeo Acop kalpasan a bimmaliktad ni Lapeña iti pammati na a saan a shabu ti linaon dagiti magnetic lifters a nasarakan dagiti otoridad iti bodega idiay General Mariano , Cavite .
Ti ekslusibo a pannakiuman ti Bombo Radyo Vigan kenni Rep. Acop, kinunana nga awan ti nakita na a pakailasinan nga adda pakainaigan ni Lapeña iti shipment ngem no ipapilit na ti pammati na ket posible a maakusaran ti panangtakkab iti iligal nga aktibidad ken panangsalaknib kadagiti kandidato.
Inbutaktak ni Acop a dagiti uppat a magnetic lifters ket saan a naaramid para iti usto a pakaiyusaran na no di ket pagkargaan ti kontrabando ta adda ti asbestos na a mangpapudot iti magnetic lifter no maidalan iti x-ray scanner tapno saan a makita ti kontrabando a karga na kas maibasar kadagiti ebidensya a naidatag.
Kabayatanna, patien ti Antipolo representative nga adda ti gangannaet a grupo a kadwa dagiti adda ti likodan ti shabu shipment ta adda pay ti impormasyon nga adda dagiti aglanglanga a Chinese a tattao a nangala kadagiti iligal a droga idiay Cavite.
