Impila da House Speaker Faustino Dy III ken House Majority Leader Sandro Marcos iti maysa a nainget a verson iti Anti-Political Dynasty bill.
Ti House Bill No. 6771 ket mangiparit iti aggigiddan wenno agsasaruno a panangiggem iti aniaman a posisyon iti gobierno dagiti agkakabagyan agingga maikapat a lebel, legitimate wenno illegitimate, half wenno full blood.
Karaman dayta dagiti nagannak, anak, agkabsat, aguliteg, agikit, kanakan, kasinsin ken dadduma pay.
Maiparit pay iti kumandidato wenno panangiggem iti posisyon dagiti common-law spouse wenno live-in tapno maliklikan iti aniaman a wagas iti panagtiritir wenno panangliklik iti linteg.
Iti biang iti kongresista, provincial, municipal ken barangay official, siasinoman a kabagyanda ket saan a mabalin a kumandidato wenno aginggem iti puesto iti isu met la a distrito, provincial, municipal, city wenno barangay office.
Iti Senado ket saan a mapalubosan nga agiddan nga agtugaw ti nagtaud iti maymaysa a pamilia a kas iti agkabsat.
Kinuna ni Speaker Dy a panawenen nga iyetnag ti napudno a reporma iti politika babaen iti panangisardeng iti dinastiya iti manon a dekada a nakasanayanen iti adu a rehiyon.
