VIGAN CITY – Pinasingkedan ni Barangay Captain Zaido Tabalanza ti Puro, Magsingal nga awan iti kina-agpasyo iti nagwaras a damag a nailockdown iti nasao a lugar gapu iti ubing a naapektaran ti covid-19.
Segun kenni Tabalanza, maila-lockdown iti lugar da manipud alas dose iti tingnga iti aldaw agingga ti rabii gapu iti pannakatay ti walo bulan a maladaga nga agsagsagaba ti leukemia ken ti tallo bulan a maladaga gapu iti panagkakapsot na ta mapapati a na-dehydrate.
Ti sabali a bangir, inlawlawag ti barangay chairman a nu maipapan met iti programa a panagited iti taraon ket kada sitio iti pampamay-anna ket sig-siguradoen da a maikkan iti amin a kalugaran na.
Kabayatanna, nangrugi idi kalman April 6 iti pannakaipatungpal iti Lockdown idiay Barangay Manzante, Magsingal manipod iti oras iti alas onse iti bigat agingga alas tres iti malem.
Agsipud iti dayta, awan iti mapalubusan a rumuar ken sumrek iti nasao a lugar kadagiti nasao nga oras malaksid laeng kadagiti otorisado a rumuwar kadagiti pagtaengan da ken dagiti frontliner ngem masapul a mangipakita iti travel pass wenno ID.
Idiay met Barangay Barbari, Magsingal, inlawlawag ni Barangay Captain Francisco Tolentino nga awan unay iti adu a pondo a nailatang para iti feeding program iti barangay da isu a dagiti laeng kuma awan iti mabalinna wennu dagiti napanglaw a pamilya iti lugar da iti mabenepisyaran.
Ingunam-gunam ni Tolentino a nakurang a dua ribo a pisos iti nailatang a pondo para iti taraon dagiti kangrunaan nga agkasapulan ngem nu adu iti naluto, amin a kalugaran na ket sigurado a maikkan.
