Saan a ninamnama ti maysa a graduate iti Technological University of the Philippines-Visayas a karaman kadagiti Rank No. 1 April 2025 Electronics Technicians Licensure Examination babaen ti rating a 95.00%.
Iti pannaki-uman ti Bombo Radyo Vigan ken ni Jayvee Caballes Fuentebella, saanna nga impagarup a maipasana ken agranggo pay gapu iti karigat iti exam-da ta idi kalpasan ti exam ket nagsasaritada nga agkakadua ket adu dagiti nagdudumaanda isu a nagdanag nga amangan nu saan a makapasa.
Segun ken ni Fuentebella, nagturpos isuna nga awan ti Latin Honor-na ngem aminado nga impaayna iti amin a kabaelanna tapno maipasa ti exam nu pay idi kalkalpas ket naawanan ti namnama a makapasa.
Iti baet a maaw-awanan iti namnama ket pagyamanna ta adda dagiti nagannakna a nangpatibker iti riknana ket positiboda latta a maipasana ken linoklokoda pay nga agrank 1.
Idi rimmuar iti resulta ket adda isuna iti pagtaenganda ket gapu ti ragsakna riniingna ti inana ket impakaammona iti ranggona ket napalaus ti panagyaman ken ragsak ti inana ken uray ti amana.
VIDEO – JAYVEE CABALLES FUENTEBELLA
Iti agdama ket aginana pay laeng ni Fuentebella ta aminado a narigat iti panagreview-da idi kallabes gapu kadagiti balakad dagiti immun-unan a nag-exam kadakuada isu nga inggaedda.
Balakadna kadagiti ag-board exam nga agtalek iti proseso iti panagadal, saan nga agsardeng a manggun-od iti arapaap, agpakumbaba ken agtalek iti plano ti Namarsua para iti panagballigi.
VIDEO – JAYVEE CABALLES FUENTEBELLA
