VIGAN CITY – Kaso a panaglabsing iti Presidential Decree 1602 ti sangwen dagiti nagsusugal idiay Sitio Namnama, Brgy. Cabittaogan, Sta. Catalina a nakemmeg babaen iti naiwayat nga anti illegal gambling operation.
Nabigbig dagiti suspek a da Guillermo Rafanan, agtawen ti innem a pulo ket maysa, mannalon; Marian Paz, agtawen ti tallopulo ket tallo; Catherine Tablada, agtawen ti duapulo ket lima; Gilbert Retialo, agtawen ti tallopulo ket tallo a nagbuya kadagiti nagsusugal ken ni; Ma. Elizabeth Rabanal, agtawen ti tallopulo ket uppat nga agpapada nga agnaed iti nasao a lugar ken naaktuan nga agaayam iti tong-its.
Segun ken ni Pol. Lt. Marcus Rafanan, nakikinnammayetda idin iti kapitan ti nasao a barangay agsipud ta adda manen idi naipadanun kadakuada nga agsusugal ngem gapu ta naulit manen iti pasamak ket nagtignaydan a mangtiliw kadagiti aglablabsing.
Kabayatanna, naala manipud kadagiti suspek ti maysa a set ti baraha ken pusta nga aggatad iti sangagasut sangapulo ket maysa a pisos ken addadan iti Sta. Catalina Municipal Police Station tapno dumalanda iti usto a proseso.
