VIGAN CITY– Nakemmeg babaen iti entrapment operation ni Marlon Barnachea , 35, baro, chef ken residente iti Brgy. Pallogan, Tagudin babaen kadagiti operatiba ti Sta. Cruz Municipal Police Station idiay Gallantel Smart money Padala center, Pobalcion Este, Sta. Cruz.
Segun ti report, nagpammarang ti suspek a recruiter iti maysa a recruitment agency ket nagdawat iti kuwarta kada Ednalyn Paredez a taga la trinidad, benguet iti PHP75,800 babaen iti Smart Money Padala PHP4000 kenni Sharon daoa a taga Brgy. Man-Atong, Suyo.
Gapu iti panagreport dagiti biktima, nagtignay dagiti otoridad ket inaramat da dagiti maysa kadagiti biktima ket nagipatulod da iti PHP1000 para ti suspek tapnu makemmeg da.
Naala manipud ti suspek iti maysa a piraso a lima gasut a pisos, tallo a piraso iti sangagasut a pisos, tallo a piraso iti singkwenta pisos, maysa a piraso iti baente pesos, dua a voter’s ID, cedula, empty simcard kits ken maysa nga slim bag a naglaon iti naduma-duma a klase iti make up.
