VIGAN CITY- Kinemmeg dagiti pannakabgi ti linteg ti nagpammarang nga abogado a ni Emil John Serafica, agtawen ti 43 , naasawaan ken taga 19 Bonifacio Street, Rosales, Pangasinan iti naisayangkat nga entrapment operation idiay Banaoang, Bantay gapu iti panagilako na ti peke a titulo ti daga.
Segun kenni PC/Insp. Ed Medrano, hepe ti Bantay Municipal Police Station, agdagupen ti nasurok P100,000 ti naala ti suspek a kuarta kadagiti nabiktima na agingga a naduktalan a peke ti inted na a titulo idi inrefer ti biktima a ni Lovina Leones Farmer idiay Land Registration Authority.
Maibasar iti insiyal a report ket tawen 2016 pay laeng idi naam-ammo dagiti biktima ti suspek babaen iti kabagyan da idiay ballasiw taaw a nagpalakad met laeng ti papeles na ket daytoyen iti maikatlo a gundaway a naisayangkat ti entrapment operation kontra kenkuana ngem ita laeng a nakemmeg.
Ti pannakiuman ti Bombo Radyo Vigan iti biktima a ni Farmer ket kinunana a agdagupen iti P72,000 ti naited na iti peke nga abogado para iti panagpatitulo na iti daga da idinto a ti kaanakan na a biktikma ket P50,000 met ti naala kenkuana.
Gapu ta dimmawat manen ti P30,000 ni Serafica iti kaanakan ni Farmer ket nagtulag da a mangipayuna ti biktima ti P15,000 ket ditan a naisayangkat ti entrapment operation.
Maisagsaganan ti kaso kontra iti suspek nga extortion ken usurpation of authority idinto a ginuyogoy ti chief of police no adda pay dagiti dadduma a biktima ti suspek nga agparang da tapno nadagdagsen ti kaso a maipila .
