VIGAN CITY – Panaglabsing iti Article 151 iti Revised Penal Code ken panaglabsing iti City ordinance No. 891 ti sangwen dagiti nakemmeg a nagaayam ti basketball idiay Sitio Ragsak, Brgy. Talogtog, Candon City kabayatan iti pannakaipatungpal pay laeng iti enhanced community quarantine.
Nabigbig dagiti suspek a da Michael Fernando, agtawen ti uppat a pulo, Armado Gravilez, agtawen ti uppat a pulo ket walo, Jay Fernando Raiz, agtawen ti uppat a pulo, Glenford Fernando, agtawen ti uppat a pulo, Rodolfo Alviento, agtawen ti uppat a pulo ket tallo, Leonardo Fernando, agtawen ti tallopulo ket uppat, Jeffrey Quilang, agtawen ti duapulo ket walo, Marvin Jake Gonzalo, agtawen ti sangapulo ket siam, Ronnel Daita, Allen Ignacio, agtawen ti duapulo ket walo ken ni Cyrus Cantre, agtawen ti sangapulo ket walo nga agpapada nga agnaed iti nasao a lugar.
Nakaawat ti Candon City Police Station ti tawag manipud ken Brgy. Chairman Ryan Prim Pascua nga adda iti agaayam iti basketball nga insigida met a rinsepondeanda ket naaktuanda dagiti suspek nga agaayam.
No pay kasta, naipanda iti Candon City Hospital para iti medical examination ken addadan iti kustodiya dagiti pannakabagi ti linteg tapno dumalanda iti usto a proseso.
