VIGAN CITY – Ingunamgunam ni Provincial Quarantine Officer Martel Quitoriano a dumalan latta iti usto a proseso dagiti agibiahe kadagiti napateg a kargamento ta saan a kayatna a sawen nga essential goods dagiti kargada ket mailaksiddan iti quarantine checkpoint.
Dayta ket kalpasan nga adda manen ti nasalamaanda iti quarantine checkpoint idiay Sinait a nagilibas kadagiti pitopulo nga ulo ti baboy a naggapu iti Ilocos Norte ken nakaikarga iti trak a minaneho ni Jose Binas Buising, agtawen ti limapulo ket uppat nga agnaed iti Pritil Street, Guiguinto, Bulacan sa dagiti dua a pahinantena a da Mark June Lorenzo, agtawen ti duapulo ken ni Albert Vasquez, agtawen ti tallopulo ket siam nga agnaed iti nasao a lugar.
Malaksid iti dayta, maysa pay a kotse a naglaon iti sangagasut a kilo ti chicharon baboy, innem a pulo a kilo ti chicken skin ken uppat a pulo a kilo ti bagis ti manok ti nasalamaan iti quarantine checkpoint idiay Bio, Tagudin.
Ti drayber ket ni Benedict Verseles, agtawen ti tallopulo nga agnaed iti San Pascual, Tanulong, Bayambang Pangasinan ken ti kaduana a ni James Paul Diago, agtawen ti uppat a pulo nga agnaed idiay Sampson, Quezon City.
Awan ti naiparangda a dokumento iti panagipastrekda kadagiti nasao a produkto ngem no pay kasta, nag-community quarantine -da imbes nga agmuelta ken naipanen iti Provincial Animal Quarantine Office dagiti produkto a nasalamaan.
