Inlawlawag ti Ilocos Sur Electric Cooperative, Inc. a ngimmato iti bayadan dagiti member consumer gapu iti kinabara iti panniempo ita a kalgaw.
Iti pannaki-uman ti Bombo Radyo Vigan ken ni Ernesto Galla manipod ISECO, no yarig idi napan a bulan ti bill iti kuryente ket posible a nadakdakkel ita a bulan gapu iti masansan a panagaramat iti kuryente dagiti umili tapno saanda a baraen iti baet ti napudot a tiempo ken panagbabakasyon dagiti estudyante a mabalin a nangnayon iti konsumo ta napapauten iti pagtalinaedda kadagiti pagtaengan.
Segun ken ni Galla, ita a bulan ket adda ngimmatoan iti bayadan ngem .8658 laeng kada kilo watt hour, ngem ti pudno a rason ti ngimmatoan iti singir iti kuryente ket gapu iti generation ken transmission cost.
Inlawlawagna nga adda iti post National Grid Corporation of the Philippines a mangibagbaga nga adda bimmasitan ti suplay ti kuryente gapu iti panagpangato iti demand.
Innayonna nga aniaman a nadisenyo a nakaipan iti statement of accounts ket saan nga ISECO iti nangaramid ta aniaman nga inyetnag iti Energy Regulatory Regulation ket isu ti sursurotenda.
