Isingsingasing ni Senador Erwin Tulfo ti pannaka-ideklara ti umuna a Lunes ti Agosto iti kada tawen kas National Line Workers Appreciation Day.
Segun ken ni Tulfo, ti panggep ti nasao a singasing ket tapno maited ti maiparbeng a pammigbig kadagiti rinibo a line workers a karaman kadagiti agar-aramid iti napeggad a trabaho ditoy pagilian para iti inaldaw a panagbiag dagiti minilyon a Pilipino.
Kinuna ti senador a masansan a maliwayan dagiti line workers no nasayaat ti serbisio ti kuryente, ngem karamanda kadagiti umuna a sumungbat no adda didigra wenno problema iti suplay ti kuryente.
Babaen iti singasing, idauloan ti National Electrification Administration wenno NEA, iti pannakitinnulong ti Department of Energy ken dadduma pay a maseknan iti industria ti kuryente, dagiti programa para iti tinawen a pananglaglagip iti National Line Workers Appreciation Day.
