Binabalaw ni House Committee on Civil Service and Professional Regulations Chair Kristine Alexie Tutor ti nababa a passing rate iti Professional Regulation Commission (PRC) licensure exam para kadagiti mangisursuro.
Segun ken ni Tutor, adu pay laeng a kolehio ti addaan iti nababa ti kalidadna nga edukasion para kadagiti masanguanan a mangisursuro, ken bassit laeng ti progreso a naaramidan ti Commission on Higher Education (CHED) tapno mapasayaat ti nasao nga issue.
Adu a programa ti edukasion dagiti mangisursuro ti nababa ti passing rates, segun ken ni Tutor.
Insingasingna ti pannakaisayangkat ti qualifying exam sakbay ti maikatlo a tawen ti kolehio, ken inallukoyna iti CHED a mangaramid ti mergers wenno consolidation kadagiti kolehio, nangruna kadagiti probinsia, tapno magun-od dagiti economies of scale a makatulong a mangpasayaat iti operasionda.
