VIGAN CITY – Saan a ninamnama ni Kapitan Dundie Baker iti Patiao, Penarrubia, Abra iti panangtulong dagiti kailianna a miembro ti Pantawid Pamiliyang Pilipino Program ta nangtedda iti relief packs kadagiti kabarangayanda a saan a nakaawat iti tulong ti gobierno.
Segun kenni Kapitan Baker, pakabuklan nga uppat a pulo ket pito a pamilia akameng iti 4P’s iti lugarda ti nangipaay iti tulong kadagiti saan a miembro iti lugarda ta nasayaat la unay iti napanunotda ta adda iti gagemda a mangtulong iti padada.
Pinasingkedanna pay a kalpasan iti inaramid dagiti kailianna ket planoda met iti mangisayangkat iti maikadua a rikos iti panagiwaras iti relief goods babaen iti aggapu iti barangay.
Pagyamanan ti kapitan iti inaramid dagiti kailianna a panagtulong iti padada a tao kangrunan tatta a panawen iti krisis ket binalakadanna ida nga itultuloy ti nasayaat a gannuatda.
