Agtultuloy a papigsaen ti Department of Education dagiti programa para iti mental health ken reporting system, a paset iti nalawlawa nga addang tapno mapagtalinaed ti kinatalged dagiti estudiante iti uneg dagiti pagadalan.
Dayta ket kalpasan dagiti nagsasaruno a pangta kadagiti pagadalan iti nadumaduma a paset ti pagilian a nangitunda iti panagbuteng iti publiko.
Karaman kadagiti addang ti ahensia ti panangpalawa kadagiti helpline ken reporting mechanism para kadagiti agad-adal nga agkasapulan iti tulong; kasta payen ti pannakairusat ti active attack safety drills, panangpapigsa iti school safety audit, agraman ti panangikabil iti CCTV ken metal detector kadagiti pagadalan.
Impaganetget ni DepEd Secretary Sonny Angara, a saan laeng a nasken nga active shooting drills ti tutukan no di ket uray ti mental ken emosyonal a kasasaad dagiti estudiante.
