Nalimlimo ti maysa nga agtagilako iti makan babaen iti pannakaawatna iti peke a duaribo a pisos a bayad dagiti gimmatang kenkuana idiay Buquig, Bantay, Ilocos Sur itay malem.
Iti pannaki-uman ti Bombo Radyo Vigan ken ni Rosita Mercurio, dua a babai iti immasideg kenkuana a gimmatang iti lakona ket isu ti pinagbayadda iti dua a peke a sangaribo.
Ti maysa a babai ket gimmatang iti dua a lumpianada nga aggatad iti P60 (P30 each), dua a pancit nga aggatad iti P60 (P30 each), ken maysa a turon nga aggatad ti P20 isu a pakabuklan a P140 idinto a ti maysa ket tallo a pancit iti ginatangna isu a P90 (P30 each) iti binayadanna.
Saan a napansin ti biktima a ti pinagbayad dagiti dua ket agpada a peke a sangaribo a pisos isu a ti maysa ket sinuklianna iti P860 idinto a ti maysa ket sinuklianna ti P900 ta nangted iti P10 kas nayon ti bayadna tapno buo a bills iti maisukli kenkuana.
Maysa kadagiti babbai iti nangibati pay laeng ti pancit a ginatangna isu nga inur-urayna ida ta ti ammona ket agur-urayda laeng iti pagluganan iti maysa a bus terminal ngem saanda metten a nagsubli.
Idi nagbalaw ti biktima ta saanna a mauray ida ket nagdamag kadagiti agtrabtrabaho iti bus terminal ket idi impakitana ti bayadda ket napansinda a peke iti inyawat dagiti babbai.
Gapu ta nagpungtot ti biktima ket saanna a naliklikan iti nagsao sao ken nagsangit ta napukawan iti nakurang duaribo a pisos iti dayta a panaglakona.
Kiddawna laengen kadagiti makaammo kadagiti babbai nga ipakaammo kadakuada tapno mabawina met laeng ti nagrigrigatanna ta adu a sakripisyo iti ipapaayna para laeng iti pagbiagda.
VIDEO – ROSITA MERCURIO
