VIGAN CITY– Selos iti mapapati a rason nu apay a tinagbat iti maysa a lalaki ti asawa na, pakairamanan iti uliteg na a bimmallaet laeng iti riri da nga agassawa idiay Brgy. Maratudo, Magsingal, Ilocos Sur.
Ti pannakiuman ti Bombo Radyo Vigan ken ni PSInsp. Bryan Tacazon, hepe ti Magsingal PNP, nangngeg ti biktima a ni Bonifacio Pasco ti panagriri ti kanakan na a suspek a ni Richard Pasco ken ti asawa na isu a nagturong iti pagtaengan da tapnu mapan aganawa.
Ngem, saan a ninamnama ti biktima nga adda ti iggem a buneng ti suspek isu nga idi linukatan na ti arwangan ket saanen a nakalisi idi tinagbat ti suspek isu a nadunor iti ulo na.
Dunor pay iti ulo ti sinagrap iti asawa ti biktima.
Ti agdama, adda pay laeng iti balay pagagasan dagiti biktima idinto a ti suspek ket nakakustodiya kadagiti pannakabagi ti linteg ket naamuan nga adda ti sakit na ti panagpanpanunut.
