VIGAN CITY – Nakemmegen ti maysa kadagiti suspek iti pannakahold-up ti Partas Bus nga agpa-amyanan a minaneho ni Joseph Medriano nga agtawen ti lima pulo a taga- II8, Inamotan, Manaoag, Pangasinan kadua na ti konduktor na a ni Carl David Yasay nga agtawen ti tallo pulo ket dua a taga- 61, Alipay St. Camposanto Sur, Moncada, Tarlac idi alas dyes dyes iti rabii ti September 14.
Nabigbig ti suspek a ni Hipolito Vega nga agtawen ti tallo pulo ket maysa a taga Barangay Labnig, San Juan idinto a ti kadua na ket sapsapulen pay laeng dagiti otoridad.
Segun ken ni Police Captain Benjamin Raquedan, hepe ti San Juan municipal police station, agpapa-amyanan idi ti bus idi adda ti lalaki a nagpara iti akin-daya a shoulder iti national highway isu a nagsardeng da.
Idi nagsardeng ti bus ta ilugan na kuman ti nagpara a pasahero, nagdeklerar metten ti hold up ti suspek ngem nagkedked ti konduktor a mangited kadagiti koleksyon na idi adda ti maysa a lalaki a naggapu iti nasipnget a paset iti lugar ket tinutukan na iti saan pay ammo a kalibre iti paltog ti konduktor isu a saanen a nakapagkitakit ket inted na ti koleksyon na nga aggatad ti sangapulo ket tallo ribo dua gasut a pisos.
Idi naala dagiti suspek ti kwarta ket naglibas da nga insigida a nagpadaya.
Kabayatanna, idi inpakita dagiti otoridad ti suspek kadagiti dua a gasoline attendant ti Harry’s Gasoline Station nga immun-unan a natakawan, positibo a binigbig da ti suspek a maysa kadagiti nagtatakaw iti gasolinaan.
