Umabot iti mapatta-patta a P350,000 ti gatad dagiti nauram iti maysa a gift shop store iti ili ti Sta. Catalina.
Dua a fire truck manipud iti Bureau of Fire Protection Sta. Catalina ti nagresponde apaman a maipakaammo kadakuada nga adda uram.
Naibayog iti maikadua nga alarma ti uram ken nadepdep iti alas dose bainte iti agsapa ti January 12, 2026.
Iti pannaki-uman ti Bombo Radyo Vigan ken ni Senior Fire Officer 2 Jonathan Ria, Chief Investigator iti Intelligence Unit ti BFP-Sta. Catalina, mapapati a gapu iti electrical overload ti rason ti uram ta adda dagiti appliance-da nga agtultuloy latta a nakasaksak para kadagiti lakoda kas kadagiti frozen goods.
Nadakamat pay ni Ria nga adda ti bodega ti nasao a pagtagilakwan a napumpunno iti karton ken papel a mapapati nga isu ti nangpakaro iti uram.
Agtultuloy latta ti panangduktal dagiti kameng ti BFP no ania ti pudno a nagtaudan ti uram ken no mano ti pakabuklan a gatad dagiti nauram.
