Maysa a lalaki iti nasarakan nga awanen ti biagna a nakaidda iti kalsada idiay Barangay Ambugat, Burgos, Ilocos Sur iti alas sais baente ti bigat itattay (November 16, 2024).
Iti pannaki-uman ti Bombo Radyo Vigan ken ni PCpt. Allan Reoliquio manipod Burgos Municipal Police Station, nabigbig ti bangkay a ni Allan Almazan Bobiles, agtawen iti uppat a pulo ket walo, naasawaan, construction worker nga agnaed idiay Barangay Suso, Sta. Maria babaen ti nasarakan nga identification card iti sling bag-na.
Segun ken ni Reoliquio, impakaammo kadakuada ti Barangay Captain idiay Barangay Ambugat, Burgos iti pannakakitada ti lalaki a natayen iti farm-to-market road idiay Barangay Ambugat, Burgos isu a nagrespondeda.
Naamoan nga idi Biernes (November 15, 2024) iti alas nuebe iti rabii ket adda nangnggeg a putok dagiti residente ngem saanda nga impagarup a putok gayamen iti paltog.
Nupay kasta, iti agsapa ti November 16 ket bayat ti pannagna ni Celestino Carta Escobar, agtawen iti limapulo ket pito, naasawaan, Barangay Tanod nga agnaed iti nasao a lugar tapno mapanna pakanen ti tarakenna a baka ket napansinna nga adda lalaki a nakaidda iti tengnga ti kalsada isu a kinitana ket naduktalanna a dara-dara ti ulo ti biktima ken awanen ti biagna.
Nasarakan dagiti pannakabagi ti linteg iti tallo a basyo iti caliber .45 ken maysa nga slug-na idinto a nakita a nadunor ti saka ken ulo ti biktima.
Patien dagiti otoridad a napasamak ti pammapatay iti biktima iti lugar a nakasarakan kenkuana.
VIDEO – PCPT. ALLAN REOLIQUIO
