VIGAN CITY – Natay ti maysa a lalaki ta pinaltogan ti asawa ti kadendennana a babai idiay Zone V, Bantay.
Nabigbig ti biktima a ni Michael Angelo Valoroso agtawen ti tallo pulo ket dua agnaed ti Brgy. Anonang Menor, Caoayan ken ti suspek a ni Ian Carta agtawen ti tallo pulo agnaed ti Brgy. Pagburnayan, Vigan City.
Basar iti imbestigasyon ti Bantay Municipal Police Station, simmangpet ti biktima kaddua ti live in partnerna iti ababanganda a transient house a sinurot ti suspek a ni Ian.
Addan iti saan a panagkinnawatan dagiti tallo agingga a nakangeg laengen ti tallo a putok ti paltog ti akinkukua iti maababangan a transient house a ni Hubert Degracia.
Insigida a nagresponde dagiti otoridad ngem naideklara a dead on the spot ti biktima babaen kenni Municipal Health Officer Dr. Lioba Tolentino.
Nakemmeg ti suspek babaen iti follow up operation idiay ili ti Magsingal.
