Nakemmeg ti maysa a lalaki a nagpaputok iti paltog idiay Barangay Poblacion, San Vicente, Ilocos Sur.
Nabigbig ti suspek a ni Jojo Acejo Papa, agtawen iti uppat a pulo ket lima, taga-Barangay Manueva, Santa.
Nagresponde dagiti personnel ti San Vicente Police Station iti Option SuperClub idiay Poblacion gapu iti mapapati a panagpaputokna.
Maibasar iti inisyal nga imbestigasyon, customer ti suspek iti nasao a lugar ket nabartek idi mapasamak ti insidente.
Kalpasanna, nagapa ti suspek ken dagiti bouncer inaig iti bayadan ti suspek agingga a napan daytoy iti luganna ket idi agsubli, nakaiggemen iti paltog ket imputokna iti namindua a daras a nakatirwan ti reception desk ti lugar.
Pimmanaw ti suspek babaen iti minanehona a lugan ket nupay kasta, awan ti nadangran iti pasamak.
Narekobre ti dua a caliber 9mm fired cartdriges.
