VIGAN CITY – Kaso nga estafa ti sangwen ti maysa nga online seller gapu iti saanna a panangtungpal iti nagtulaganda iti linakoanna.
Nabigbig ti suspek a ni Carlito Estrada Pumaren, agtawen iti tallopulo ket lima, taga-Barangay Tanza, Baybay, Iloilo City, Iloilo.
Ti met biktima ket ni John Mark Villaruz Obongen, agtawen iti duapulo ket siam, technical trainer, taga-Barangay Suso, Sta. Maria, Ilocos Sur.
Segun ken ni Police Major Macario Dulawan, March 25, 2024 idi nag-inquire ti biktima iti Facebook Marketplace inaig ti laptop nga impost ti suspek ket nareplyan babaen iti messenger nga isu ti narugianen ti transaksyonda.
Idi nagtulagdan, iti isu met laeng nga aldaw, 7:19 iti agsapa, nakiddaw iti buyer nga agitinnag iti sangaribo a pisos para iti pannakaireserba ti produkto ket indepositona met daytoy babaen iti GCash plaform.
1:49 iti malem, naipatulod manen babaen met laeng iti GCash ti balansena a PHP13,970.
Iti dayta met laeng koma nga aldaw nga ipatulod ti suspek ti produkto ta nabayadan metten ti biktima ngem awan ti naawatna.
May 28, 2024, iti 06:46 iti rabii ti naudin a conversation ti suspek ken biktima, ngem awan latta ti naipatulod a produkto ken indelete ti suspek ti Facebook acc1ount na.
