VIGAN CITY – Natay ti maysa nga agtawen-iti-sangapulo ket walo a lalaki a ni Joross del Castillo, taga-Capangdanan, Bantay gapu iti pannakakagatna iti uleg a kulay brown a saan pay a masinunuo no ania ti klasena.
Mapan koma ti biktima iti talonda a mangkita kadagiti pagayda a kankanen ti maya idin ta nabaddekanna ti uleg a nangkagat kenkuana.
Ginalutan dagiti kakaduana ti paset a nakagat sa impaagasda iti ospital.
Ngem segun ken ni Clara Raguindin, ikit ti biktima, ladingiten ken sakiten ti nakemna a saanda man laeng nga impaayan iti first aid ti biktima idi inikkatda ti naitali tapno dalusanda ken ti panagkuna dagiti nurse nga awan ti anti-venom da.
Nagkiddawda pay iti ambulansya a mangitaray iti pasyente iti Ilocos Norte ngem kinunada nga awan.
Ipagarup payen ti ikitna a diskriminasyon ti naiparikna kadakuada gapu iti panagturongda a pitak-pitak iti ospital nga amangan ta saanda a kabaelan ti agbayad.
Nupay kasta, kiddaw ni Raguindin nga adda maipaay ditoy Ilocos Sur nga anti venom nga agas ta adun dagiti kastoy a pasamak iti probinsia ngem saanda a makalaslasat gapu iti kaawan dagitoy a masapul a pangtaming.
Kabayatanna, pinasingkedan met ni Rosana Pablico Del Castillo a dakkel a sakit ti nakemna iti ipupusay ti anakna a nagubing pay laeng ti tawenna.
Inladawanna met daytoy a nasingpet, makatulong ken nagaget.
