Pinagtignayen ni PNP Acting Chief PLT. Gen. Jose Melencio Nartatez Jr dagiti police unit iti Bangsamoro region tapno mabigbig ken matiliw ti mastermind iti pannakapaltog ni Shariff Aguak, Maguindanao del Sur Mayor Akmad Mitra Ampatuan idiay Barangay Poblacion.
Segun ken ni Nartatez, mangbukelda iti Special Investigation Task Group tapno makaala iti forensic evidence manipud iti lugan ken dagiti paltog dagiti suspek, ken makabukel iti natibker a kaso kontra kadagiti responsable iti pangraut iti grupo dagiti mayor.
Binilin ni Nartatez ti PRO-BAR tapno pabilgen ti kampania kontra kadagiti illegal firearms iti intero a rehion tapno maliklikan ti kastoy a panagraut ken masigurado ti kinatalged ti publiko.
Impaganetget ti PNP a natibker ti takderda kontra iti kinaranggas nga adda pakainaiganna iti pulitika idinto a nagballaag ni Nartatez kadagiti indibidual a nanggandat a mangriribuk iti rehion.
