VIGAN CITY – Maysa a lalaki ti nakemmeg gapu iti pammagkong idiay Manuella’s Inn, Barangay III, Vigan City, Ilocos Sur.
Nabigbig ti suspek a ni King Leonar Aguilar Micnat, agtawen iti duapulo ket walo, massage therapist, tubo iti San Vicente, Gapan, Nueva Ecija ngem aggigyan iti nasao nga establisimiento.
Ti met biktima ket ni Gido Fredo Aberajon Javier, agtawen iti duapulo ket innem, massage therapist, tubo iti Bagong Sikat, Cabanatuan City, Nueva Ecija, agab-abang met laeng iti nasao a transient house.
Alas sais bainte iti rabii, nagresponde dagiti personnel iti nasao a pammagkong.
Iti pannaki-uman ti Bombo Radyo Vigan ken ni PLTCOL REYNALDO MENDOZA Jr., pinadas ti witness ti sumrek iti kuarto nga ayan ti biktima ken suspek ngem saanna a nalukatan.
Alas sais iti rabii iti nasao a petsa, nakigtotda ti witness ken ti kabsat ti biktima idi nangngegda ti suspek ken biktima nga agpimpinnukaw iti uneg ti kuarto.
Gapu dayta, pwinersada a lukatan ti aruangan, ket idi nakastrekda, nakitada ti biktima a binagkong ti suspek iti comfort room ti kuartoda.
Ti biktima ket nakita dagiti witness a daradara ken adda dunor iti akin-kannawan a pingpingna ken nadumaduma a paset ti bagina.
Naipaagas iti Metro Vigan Cooperative Hospital ti biktima para iti naan-anay a pannakatamingna.
Kabayatanna, narekobre met dagiti pannakabagi ti linteg ti nausar a patadem nga agrukod iti 6 ½ inches karaman ti apputanna.
