VIGAN CITY – Maisayangkat ti Mass Wedding inton December 2, aldaw ti Lunes, babaen iti panagkikinnammayet ti City Government ti Vigan, Balikatan sa Vigan, ken dadduma pay a maseknan nga ahensya ken organisasyon.
Segun kenni Vigan City Social Welfare and Development Officer Celly Agcamara, pakabuklan nga uppat a pulo ket uppat a paris iti agkallaysa iti nasao nga aldaw a ti seremonya na ket maisayangkat idiay Saint Paul Metropolitan Cathedral nga atendaran to dagiti opisyales ti siyudad nga agserbi a ninong ken ninang dagiti agkasar.
Kalpasan iti seremonya ti kasar idiay simbaan, maisayangkat to ti reception idiay Vigan Convention Center.
Maibasar iti rekord da, ti kabaketan ken kalakayan nga agkasar ket agtawen ti uppat a pulo ket pito nga agnaed idiay Barangay Salindeg, Vigan City a nabigbig nga isu da Chavit Arreola kenni Erika Asqueta.
