Makapaskua manen ditoy pagilian ti dati a death row convict idiay Indonesia ken overseas Filipino worker a ni Mary Jane Veloso ta sumangpeten inton bigat, December 18 ta ditoy pagilian a ma-detain.
Segun ken ni Department of Foreign Affairs Undersecretary Tess Lazaro, manamnama a sumangpet ni Veloso iti Manila manipod Jakarta, Indonesia iti alas sais iti bigat.
Nasentensyaan ti dusa a pannakatay idiay Indonesia ni Veloso, agtawen iti tallopulo ket siam gapu ti kaso a drug trafficking idi naalaan iti 2.6 a kilo iti heroin iti airport iti nasao a pagilian.
Impaganetget ni Veloso a naipatulod laeng kenkuana ti bagahe ket nakemmeg ditoy pagilian dagiti nangipatulod kenkuana idiay Indonesia ken nakasoanda ti human trafficking.
Tawen 2015 idi impaayan ni dati a presidente iti Indonesia a ni Joko Widodo ti temporary reprieve ni Veloso isu a saan a natuloy ti pannakabitayna.
Idi laeng Enero idi nagsurat ti pamilia ni Veloso ken ni President Ferdinand Marcos Jr. ken Widodo tapno kiddawen ti clemency ti OFW.
Idi Nobyembre ket kinuna ni Marcos a nagtulag iti Manila ken Jakarta nga iyakar ni Veloso ket pagyamananna ti baro a presidente iti Indonesia a ni Prabowo Subianto iti panangidaulona.
Immunan a pinasingkedan ti Bureau of Corrections Director General Gregorio Catapang Jr. a posible nga iti Correctional Institute for Women idiay Mandaluyong City iti pakaipanan ni Veloso apaman a makasangpet iti pagilian.
