VIGAN CITY- Kinontra ni Magdalo Party-list representative Gary Alejano ti posible a pannakapatiddog manen ti martial law idiay Mindanao gapu iti nagsarano a pammomba idiay Sultan Kudarat ta mangitunda laeng iti panagbuteng dagiti tattao ken maapektaran ti imahen ti mindanao ken iti intero a pagilian kas nariribok ti lugar.
Ti pannakiuman ti Bombo Radyo Vigan , inlawlawag ni Alejano nga arig na agbalinen nga ordinaryo ti martial law no adda dagiti mapasamak a riribok ken posible a maipatungpal to pay iti intero a pagilian a saan kuma a rumbeng ta dakkel ti pondo ti kasuldaduan para iti security ken intelligence operation tapno malapdan iti anya man a klase ti riribok ken panagraut.
Kwinestyunaran pay ti agpanpanday linteg ti martial law nga agdama a maipatpatungpal itatta idiay Mindanao ta napasamak latta ti pammomba idiay Sultan Kudarat,sabali pay iti napasamak idiay Basilan.
Iti sabali a bangir, naupay ni Alejano ta agingga ita ket awan pay ti naipakita ti gobierno a nalawag a plano para iti rehabilitasyon ti marawi city isu a saan pay narugian .
Inpaganetget ti agpanpanday linteg a saan a rumbeng a pagbalinen a negosyo ti rehabilitasyon isu a saan dan nga aguray kadagiti investors tapno rugian ti rehabilitasyon ti syudad.
