Pinasingkedan ti Presidential Anti-Organized Crime Commission (PAOCC) a nawaya latta a makasubli ti pagilian dagiti mapapanaw a gangannaet a mangmangged ti Philippine Offshore Gaming Operators (POGO) ken Internet Gambling Licensees (IGL) nu saanda a ma-blacklist iti gobierno.
Segun ken ni PAOCC Spokesman Dr. Winston Casio, ti laeng mapa-deport ken maideklarar a blacklisted ket dagiti nakemmeg a foreign workers kadagiti iligal a POGO ken IGL.
Dagiti agtrab-trabaho kadagiti ilegal a POGO ken IGL ket mai-repatriate ngem mabalinda latta nga agsubli iti Pilipinas malaksid laeng nu mangiruar ti polisiya iti national government a mangipan kadakuada a blacklist.
Maipalagip a naikkan ti innem a pulo nga aldaw ti 20,000 foreign POGO workers a pumanawen iti pagilian kalpasan nga impagel ni President Ferdinand Marcos Jr. iti maikatlo a State of the Nation Address-na.
Kabayatanna, dagiti ilegal a POGO workers a naipa-deport manipod may 2023 ket umaboten ti 1,698.
