VIGAN CITY – Kaso a grave threat ken malicious mischief ti sangwen ni Onofre Jr Aguilar, agtawen ti duapulo ket siam, mannalon nga agnaed idiay Brgy. Baracbac, Tagudin gapu iti pananggandatna a mangpabettak ti granada idiay Brgy. Del Pilar, Tagudin.
Segun ken ni Police Captain Omar David, hepe ti Tagudin municipal police station, napan nagipulong ni Rogelio Sagun, agtawen ti innem a pulo ket tallo, mannalon ken agnaed iti nasao a lugar kadakuada a pinurwakan isuna ti suspek iti granada gapu ti pagin-innagawanda nga irrigation hose nga isu iti poon a nagririryan da.
Inpurwak ti suspek ti granada a kunana a napidutna iti taltalon ngem saan a bimtak gapu ta daanen.
Inbaga ti suspek a ti granada nga inpurwak na iti sangwanan ti biktima ket napidot na iti taltalon ket boluntaryo nga insuko na kadagiti pannakabagi ti linteg.
