Pimmusayen ti maysa a mannalon a biktima iti pannagbat idiay Barangay San Juan, Cervantes, Ilocos Sur.
Nabigbig ti biktima a ni Dante Briones Valdez, agtawen iti limapulo idinto a ti suspek ket ni Ariel Anga-angan Agcon, agtawen iti tallopulo ket innem, agpada nga agnaed iti nasao a lugar.
Iti pannaki-uman ti Bombo Radyo Vigan ken ni PLT. Resurreccion Padiwan, awan ti dati a susik ti biktima ken suspek ngem adda laeng nagsinnungbatanda mainaig iti pinagpadanum ti biktima iti talonna.
Natakuatan a ti biktima ket saan a karaman iti National Irrigation Administration ti talonna idinto a ti talon ti suspek ket karaman.
Impak-ol met ti suspek ti natangken a banag iti likudanna isu a bimmales ti biktima ket nangasot iti buneng manipud iti bakrangna ngem naagaw daytoy ti suspek ket intagbatna iti biktima iti namin-adu a daras iti likudanna.
Gapu dayta, nagsagrap ti biktima iti dunor iti nadumaduma a paset ti bagina kangrunaan iti ulo a puon ti nakatayanna idinto a ti suspek ket nadunor ti akin-kannigid a takyagna.
