Pagpapatangan pay laeng ti transport group a Maniebla no mangisayangkatda iti tigil-pasada gapu iti manamnama a panagpangina ti presyo ti produkto-petrolyo.
Segun ken ni Manibela Chairman Mar Valbuena, naituding ti panagtataripnongda para iti nasao a banag ngem posible latta nga agprotestada iti Department of Energy.
Innayon ni Valbuena nga uray posible pay laeng ti panagpangina ti kada litro ti krudo iti P80, addan dagiti paggasolinaan a nagpangina iti P90 kada litro kadagiti sumagmamano a lugar iti Metro Manila.
Gapu dayta, immapela ti grupo iti gobierno nga imbestigaran ti panaggundaway iti mapaspasamak a riribuk iti Middle East nangruna ta stock pay laeng iti langis dagiti mailaklako iti agdama.
Nagpanawaganda pay iti gobierno nga alistwan ti panangipasardeng iti excise tax ti langis, kasta payen ti panawaganda para iti fuel subsidy ken provisional fare hike.
