Inaprubaranen ti Department of Budget and Management (DBM) ti P2,000 a nayon nga honoraria kadagiti mangisursuro ken dadduma pay a poll workers nga agserbi iti midterm elections inton Lunes.
Segun ken ni Budget Secretary Amenah Pangandaman, kasaruno dayta iti bilin mismo ni President Ferdinand Marcos Jr. nangruna ket ammo iti gobierno ti rigat dagiti mangisursuro ken dadduma pay a makumikom tunggal panagbobotos.
Gapu ti nayon a P2,000 ket umaboten iti P12,000 ti baro nga honoraria rates para ti chairperson ti electoral board, idinto nga P11,000 met ti poll clerk ken 3rd member ken umaboten iti P8,000 manipod iti P6,000 iti maawat ti support staff.
Inallukoy met ni Pangandaman ti Commission on Elections ken dadduma pay nga ahensya iti gobierno a siguradoenda a maawat nga insigida dagiti mangisursuro ken dadduma a poll workers iti benepisyoda.
