Mangisursuro idiay Japan, naikkat iti trabaho ta naduktalan nga adda sideline-na iti maysa a convenience store

Naikkat iti trabaho ti maysa a mangisursuro nga agtawen iti innem a pulo idiay Okayama, Japan ta naduktalan nga adda sideline-na iti maysa a convenience store a maibilang a panaglabsing iti kontrata dagiti pampubliko a mangisursuro iti nasao a pagilian.

Ti pannakaduktal kenkuana ket babaen ti pannakakita ti principal iti pagtagilakoan iti day off-na.

Nainget a maiparparit idiay Japan ti kaadda ti sabali a trabaho tapno matutukan ti empleado ti kangrunaan nga akemna.

Inamin met ti mangisursuro a nangrugi a nagubra iti pagtagilakoan idi November 2023 tapno manayonan ti pastrekna, ken nagkiddaw iti pammakawan iti publiko gapu iti panaglabsingna.