Inyunay-unay ti Supreme Court (SC) nga iti premarital sexual relations a nagresultaan iti panagsikug a saan a naikasar ket saan a maibilang a disgraceful wenno immoral, isu a saan a mai-justify ti pannakasuspenso ti maysa nga empleyado.
Iti 18-page decision, kinuna ti SC First Division nga illegal ti desisyon ti maysa a Christian school idiay Bohol idi 2016 a sinuspensoda ti grade school teacher gapu iti panagsikug na a saan a naikasar.
Ti nasao a school teacher ket mangisursuro ti language, physical education, arts, mother tongue, ken writing.
Idi September 2016, idi dua a bulan a masikug ket inasetganna ti grade school principal ken administrative team head-da tapno ipakaamo ti panagsikug na.
Ngem nagdesisyon ti administrative team head a masuspenso ti nasao a school teacher ken saan nga ag-report iti klase na agingga saan a makaipakita dagiti dokumento a mangpaneknek nga isu ket naikasaren ti nobiona, nga ama ti ubing a sikug na.
Nakaawat met ti mannursuro iti written notice a mangibagbaga nga isu ket nasuspenso nga awan ti sueldona gapu iti immorality agingga a makaasawa.
Gapu dayta, nagipila ti mangisursuro ti reklamo nga illegal suspension.
Nagdesisyon ti Labor Arbiter nga isu ket constructively dismissed ngem kinontra dayta ti National Labor Relations Commission.
Kabayatanna, inkeddeng ti Court of Appeals nga awan ti constructive dismissal iti trabaho, no di ket di natakuatanda nga illegal ti suspension ti mangisursuro.
Iti desisionna, pinasingkedan ti SC nga iti findings ti CA ket illegal suspension.
Inyunay-unay da nga iti sexual intercourse iti nagbaetan dagiti dua a nataengan nga adda consent na ket awan ti legal impediment a maikasar ken saan nga immoral.
