Plano nga ipatungpal ti Department of Education ti “mandatory” inspection kadagiti bag kadagiti pagadalan kalpasan ti pammaltog a napasamak iti maysa a pagadalan idiay Tacloban City.
Dayta ti pinasingkedan ni DepEd Assistant Secretary Roger Masapol iti panagdengngeg ti House Committee on Basic Education and Culture nga idadaulwan ni Rep. Roman Romulo mainaig kadagiti pasamak ti kinaranggas kadagiti sumagmamano a pagadalan iti pagilian.
Aminado ni Masapol nga agbalin a “nightmare” wenno batibat ti kastoy nga addang nangruna kadagiti dakkel a pagadalan nga adda rinibo nga estudiantena.
Innayon ti opisial a no natuloy ti pannakaipatungpal ti mandatory bag inspection ket mabalin a mayad-adu ti linya dagiti estudiante a sumrek iti pagadalan ken agaramat kadagiti walk-thru wenno hand held metal detector.
