VIGAN CITY– Imon iti kangrunaan a makitkita dagiti otoridad a rason iti pannakapapatay iti manager ti Shakey’s restaurant idiay Zone 5, Bantay, Ilocos Sur.
Binigbig iti hepe ti PNP-Bantay a ni P/Insp. Edmund Artates ti biktima a ni Keinth Doon, agtawen iti dua pulo ket siyam, naasawaan ken residente ti Brgy. Poblacion, San Vicente idinto a ti suspek ket isu ni Leo Ubilas, agtawen iti tallu pulo ket dua, ken taga-Patong, Magsingal.
Maibasar iti imbestigasyon, nakatakder ti biktima iti counter iti nasao a panganan idi simrek ti suspek ket pinaltugan na ti biktima.
Nakataray pay laeng ti biktima agingga iti paginnawan iti nasao a panganan ngem kinamat ti suspek.
Adda met iti uneg iti panganan iti asawa ti suspek a ni Richelle Ubilas a katrabahoan ti biktima ket inanawa na ti suspek ngem saan a nagsardeng.
Idi naawanen iti bala iti paltog ti suspek, linuguban dagiti empleyado iti nasao a panganan ti suspek a rason iti nakakemmegan na.
Nagsagaba ti biktima iti tama iti paltog iti barukong ken sikigan na a rason iti nakatayan na.
Mapapati a cal. 38 a paltog iti naaramat iti nasao nga insidente kas maibasar kadagiti basyo iti bala a nasarakan iti nakapasamakan iti insidente.
