Binanatan ti Malakanyang ni Vice President Sara Duterte ken imparupada nga awan ti naitulongna iti pagsayaatan ti pagilian.
Sungbat daytoy ti Malakanyang iti banat ni VP Sara a nasken a tutukan dagiti opisial ti gobierno ti kinaurnos, kappia, ken panagdur-as ti pagilian ta nabayagen nga agur-uray dagiti umili a sumayaat ti biagda.
Segun ken ni Palace Press Officer Atty. Claire Castro, nakapokus ni Presidente Ferdinand Marcos iti kappia ken panagdur-as ti pagilian ta awan sarday ti panagtrabahona.
Saan a kas iti bise presidente a masansan nga agbakasion ken pumanaw iti pagilian, kas innayon ni Castro.
Impaganetget pay ti Palace Press Office a liklikmoten ti Presidente dagiti nadumaduma a probinsia tapno makaited iti tulong ken serbisio kadagiti umili nangruna kadagiti naapektaran iti didigra idinto a ti bise ket agbakbakasion iti sabali a pagilian.
